افضل اسعار مستشفيات الولاده لكل اماره في الامارات
الكثير من النساء يبحث عن افضل وافخم مستشفيات ولادة في دولة الامارات مثل امارة دبي والشارقة وابوظبي والجفيرة وعجمان ومن هنا نضع لكم قائمة أفضل أسعار مستشفيات الولاده .
أسعار مستشفيات الولادة 2020
مستشفيات دبي , hospital birth emirates
الحكومي ( دبي والوصل )
دبي في منطقه ديره والوصل في بردبي
سمعتهم معروفه وفيهم الزين والشين ومثل ما ناس كثيره تمدحهم في ناس بعد تذمهم
طريقة التسجيل فيهم
من خلال الذهاب لاي عيادة في الرعاية الصحيه وفتح ملف هناك ومن خلال العياده يتم تحويل الام الحامل الى المستشفى على حسب منطقه السكن
للمواطنات وزوجات المواطنين ومن دول مجلس التعاون ساكني امارة دبي فقط مجانا اما الوافدين من جميع الجنسيات 5000 درهم للمراجعات اثناء الحمل و 7000 للطبيعي و 9000 للقيصريه وتشمل اقامه في غرفه مشتركه لليلتين والقيصريه اكثر وفي حال تعرض الجنين لاي مضاعفات يتم ادخاله الى العنايه مجانا لانه تم توليده فالمستشفى
عيبهم ما تقدرين تختارين الدكتوره فلا تسالون منو احسن دكتوره
انتي وحظج لان الممرضات هم الي يولدون مو دكتورتج الي اتابعين معاها مثل الخاص
آراء العضوات في المستشفيات
إقتباس:
الرسالة من MISs Dlo0o
بنات شو رايكم بغرف الفي اي بي اللي في مستشفى دبي ؟؟؟؟
يمدحون غرف ال VIP في مستشفى دبي
بس ما يمدحون العنايه والاهتمام هناك
*
الغالية انا اختي ولدت هناك وايد زين و اهتمام حرام الي يقولون ما شي اهتمام و احلى شي الأكل والله روعه كان اييبون المينيو و انتي تختارين لليوق و الغدا و العشا و النيرسات وايد حبوبات.
*
حبيت اسال عن مستشفى الوصل ….كيف اقدر افتح ملف عندهم … انا من عيمان و في الشهر 5 واول مره احمل و وايد احاتي سالفه المستشفيات هاي …قالولي وايد صعب افتح ملف في الوصل.
وحبيت بعد اسال عن اسعارهم ؟
قالو النظام اليديد انهم مايستقبلون غير اهل دبي واهل الشارجه وعيمان بيحولونهم على مستشفى دبي .
*
اختي على حسب … تقدرين تفتحين ملف عندهم
انتي قد سرتي عالجتي فعيادات دبي مثلا طوار او القصيص ، يعني لازم يكون عندج ملف فالعياده
اذا كان ملفج في طوار انسي ,, مستحيل يحولونج على الوصل .. عاادي بيحولونج من العياده بس في مستشفى الوصل ما بيطيعون يعطونج موعد .. و بيحولونج ع مستشفى دبي
اما اذا عندج ملف فالقصيص .. دايركت بيحولونج على الوصل .. اول شي تدخلين على دكتور عام و خلاف يعطونج التحويله و طبعا اوراق التحاليل .. بس التحاليل تسوينها في العياده عندهم
بعد ما يعطونج موعد في مستشفى الوصل تتصلين عيادة القصيص وتطلبين المختبر و تخبرينهم متى موعدج وبيعطونج تاريخ حق التحاليل وخلاف تتصلين مستشفى الوصل وتاخذين موعد حق السونار
واذا ما عندج ملف من الاساس ،، اتصلي عيادة القصيص وخبريهم انج تين تفتحين ملف عندهم وتخبريهم عن الاجراءات حق فتح الملف
واذا فتحتي الملف بتكون الاجراءات مثل ما شرحت لج فوق .
———-
المستشفيات الخاصه
المستشفى الدولي الحديث يقع في منطقة المنخول
*
اليوم اتصلت على المستشفى الدولي الحديث اسأل عن أسعار الولادة عندهم قالولي الولادة الطبيعية 10000 بدون ابرة الظهر
والقيصرية 20170 شامل التخدير طبعا لثلاث أيام.
وهذا السعر غير شامل معاينة البيبي يعني معاينة البيبي له سعر ثاني
________________
مستشفى ويلكير
في منطقه القرهود
إقتباس:
رأي الله maithany_S
بنات بليز شو رايكم في ويلكير ؟ عند دكتورة متيلفا ؟
مافي احسن من ويليكير شوو اهتمام شو رعايه كثير ممتازة خدمتهم
*راي : مستانسة
بنات ساعدوني ما هو رايكم بمستشفى وليكير عند الدكتورة كفاح العراقية وما هو رايكم بمركز الانجاب في الشارقة لان الدكتورة عفاف حلمي تولد هناك .
الغالية انا ولدت عند الدكتورة كفاح
وهي اكثر من ممتازة استشارية وحبوبة وجدا حنونة و صبورة وقت الولادة
تحسينها عارفة شغلها وخياطتها نظيفة وما تحسين فيها وترصج رص ^_*
والمستشفى وايد اوكى والنيرسات حبوبات ويهتمون فالبيبي عددل ويريحونج
يعطونج مشد لبعد الولادة وتيج مدربة تعلمج حركات تشد البطن فيه وايد مميزات نسيت احين كملت سنة من ربيت
____________________
مستشفى ميدكير
في منطقه الصفا
انا الحمدلله من عشر ايام ربيت في ميدكير اللي في الصفا فدبي ..
من قبل كنت اراجع عندهم استشاريتي الدكتورة وفا سليمان ..
والحمدلله وايد وايد وايد ارتحت … من ناحية الدكاترة والممرضات …
*
ربيت بالأربعاء وكنت بترخص بالجمعه بس النونو صار فيه حرارة ورقدوه في العناية .. وترخصنا بالأحد.
طلع الباكيج ب 9500 … على الضمان … وبس دفعنا 500 اضن حق تحاليل دم …
والغرف الخاصة العادية زينة ووسيعه … وشي عندهم غرف رويال وفي اي بي ..
*
الميد كير ….الغرفه العاديه ب10000 بدون الادويه والبيبي
الفي اي بي ب 14000 والرويال ب 16000 والفرق بين الغرفتين البلكونه ومن تدخلين حق الولاده يحسبون عليج يعني لج 48 ساعه واذا تبين يوم زياده اليوم ب 4000
*
انا سالت في الميدكير وقالولي انه الغرفه مع الدكتوره والبيبي ب 12017درهم
هذا اذا طبيعي
اما القيصيريه ب22017 درهم وشوي مع الغرفه والدكتوره والبيبي
وانا دكتورتي وفاء وهذا السعر على حسب دكتورتج.
*
هذي الغرفه العاديه ….بس وايد ضيجه الغرفه اذا ما شفتيها انصحج تشوفينها خاصه اذا ايونج وايد ضيوف…
واذا ولد التطهير ب 1200 واذا تبين ابره الظهر 1500.
*
بنات انا اراجع في ميدكير عند لوثرا
بس انا اشوف اسعارهم من النت للباكج
Health Packages : Maternity Package
Medcare Normal Delivery Package (M.D.P)
Duration: 2 days stay
Royal Suite: AED 16,500
VIP Suite: AED 14,500
One Bed Suite: AED 8,500
Twin Sharing Room: AED 7,500
Medcare Caesarean Package (M.C.P)
Duration: 4 days stay
Royal Suite: AED 32,500
VIP Suite: AED 28,500
One Bed Suite: AED 16,000
Twin Sharing Room: AED 14,000
بس عن الدكتوره بصراحه عندي تعليق عليها انا صح مرتاحه لها بس يوم قلت لها اني فتحت في الوصل ملف احتشرت عليه اونه انتي بتولدين عندي ولا عندهم قلت لها اني بولد عندها بس هذاك للطوارئ وغير هذا الموضوع بعد نفس الشي عن فحص من الفحوصات سويته هناك في العياده العاديه زين ماكلتني ماعيبني رد فعلها بصراحه
غير هذا انا طلع عندي التهاب بول يوم فحصت في الحكومه وهم عندهم مول ماطرولي اي شي تخيلي بصراحه انا خفت انهم مب اكيدين في الفحوصات ؟؟!!
وانا خبرتها عن النتيجه قالت انزين خذتي دوا قلت لها عطتني مضاد قالت عيل هاتيلي التقرير مال الزراعة
*
للاخوات اللي يسالن عن مستشفى
ميدكير
كانت ولادتي الثانيه فيه عند دكتورة لـوثرا ممتازه وخبره لكنها عصبيه شوي.
يعني اللي ما يسمع كلامها ممكن يحصله هزبه بس كخبره تعتبر الافضل في المستشفى وهيه كانت في ولكير قبل ……
الولاده كلفتني 25 الف لحد يسالني عن التامين لاني ما عندي خبره انا دافعه روحي ….اعتبرو ولادتي مش طبيعيه لانه البيبي ما تحرك فسحبوه وعطوني طلق صناعي وما فاد قبل طبعا الغرفه كانت في اي بي رائعه اعتبرها من احسن الغرف اللي شفتها حتى احسن عن الستي هوسبتال اللي طايرين فيه الناس حاليا
وكان معايه اربع نيرسات في الولاده حنونات وطيبات وووايد ريحوني صراحه وبعد دكتوره مصريه بس ناسيه اسمها كانت ويايه لانه لوثرا ما اتم اتسير وترد لين وقت الولاده
*
خواتي اللي يسألن عن ميدكير
مرت أخوي ربت عندهم ،، عند دكتورة وفاء العراقية
صراحة هي ما كانت مسويه بطاقة تأمين وربت توأم أولاد بعملية
وتمت يومين ونهار الثالث طلعت من المستشفى
و البيبيهات حطوهم في غرفة الملاحظة عشان تنفسهم كان سريع شويه
خذوا عنا أربعين ألف
بس مثل ما قلتلكم ( ما كانت مسويه تأمين )
___________
المستشفى الامريكي
الأمريكي ممتاز للولادة عن تجربة أما بالنسبة للأسعار فالباكيج للولادة الطبيعية بحوالي 10000درهم شاملة النوم لمدة ليلتين أما الولادة القيصرية فحوالي 20170 درهم و إليك الرابط لمزيد من التفاصيل:
______
المستشفى الكندي
يقع في منطقة ابوهيل
*
انا ولدت بمستشفى الكندي التخصصي فرع بوهيل فدبي عند الدكتوره زينب
والصارحه قمه على قمه من كل شي
فالوصل كانوا بيسوون لي عمليه عسب السكر والضغط بس هي قالت بولدج طبيعي ع مسؤليتها والحمدلله تسهلت والكل مستغرب كيف ولدت طبيعي.
تميت يوم فالعنايه لان الضغط سوالي بداية تسمم حمل عسب جذيه ولدت قبل موعدي بس صدق العنايه المركزه عندهم غير وايد يهتمون بالمريض وولدي نفس الشي والحمدلله طلعنا منها ثاني يوم
والمراجعات كلها كانت عندهم لان فالوصل وايد اهملوني ولا كاني عندي كل هالمشاكل خص ان السكر اثر ع ولدي وما كان يكبر في بطني فحسيت بالفرق بينهم وبين الوصل وطنشت الوصل وكملت عندهم والزيارات مفتوحه لين الصبح كان ريلي يخلص دوامه ويجي الساعه 3 الفجر ويبات عندي لما تروح امي.
كانوا كل ساع يعقمون لي الخياطه بالميبو والبيتادين والحمدلله الخياطه فنانه مول مو مبينه
والممرضات حبوبات والاداره بعد نفس الشي تميت عندهم 4 ايام لين ما تطمنوا اني اوكي موب شرات الحكومي سيده يروغون الحرمه ثاني يوم اذا مربيه طبيعي
الولاده عندهم طبيعي مع اقامة ليلتين ب 8500
القيصريه ما عندي فكره
نسيت اقول ان الدكتوره واغلب الممرضات ودكتور العنايه مال الاطفال كانوا يشتغلون فالوصل
ترا اغلب الدكاتره الزينين طلعوا من الحكومي
بس انا تميت فالعنايه وولدي نفس الشي فاتورتي طلعت 17 الف وولدي 7500 بس صحتنا اهم من فلوس الدنيا وادفع اكثر ولا اولد بعمليه
*
تجربتي كانت في مستشفى الكندي التخصصي بس دكتورتي نوال العباسي
كنت اراجع عندها شهريا
ما سرت الوصل الا مرتين بس افتح ملف
كنت مربية قيصرية كلفني أنا والبيبي 20 الف تقريبا
بس لان الدكتورة سوتلي عمليتين 2 ان 1 حصلت كيس فالمبيض وقت العملية وطلعتة بالمرة.
______________________
مستشفى بلهول
يقع في ديره
بخصوص مستشفى بالهول والدكتوره نهله كثير يمدحونها ويمدحون المستشفى
الغلا انا بعد اراجع عند الدكتوره نهله وهي مولده اختي وحرمة اخوي ويمدحونها وايد بس هي ولدتهم في دبي الدولي
ياليت حد يخبرنا عن مستشفى بالهول وغرفهم وعنايتهم
وبخصوص السعر سالت الدكتوره قالت ب 9000
4000 حق الدكتوره و5000 حق المستشفى
*
الرسالة الأصلية كتبت بواسطة UAQ_LADY
اللي في ديره الغاليه وماعرف اتوقع مب شامل الغرف
الغاليه بس حبيت افيدج اتصلت فبالهول وسالتهم قالوا الولاده الطبيعه ب 9000 درهم شامله يومين لغرفه خاصه..والقيصريه ب 14000 شامله 4 ايام لغرفه خاصه
_______
مستشفى ان ام سي
يقع في منطقه القصيص
الرسالة الأصلية كتبت بواسطة UMM ALI
بنات انا اراجع في مستشفى ان ام سي اللي ورا صحارى عند الدكتوره برفيينا اللي عندها خلفية عن هالمستشفى والدكتوره اتخبرني لاني مترددة وايد ما اعرف وين اربي
صراحه خدمتهم ممتازه والمموضات ما شي احسن عنهم …مرت اخوي من شهر ربت عنهم بس ما شاء الله الممرضات ع راسها وايد زينين ودكتورتها وايد زينه بس ما اذكر اسها…بالنسبه للسعر طلع 19000 لان الولاده قيصريه + الغرفه اللي كانت فيها VVIP
لان هم عنده 3 انواع من الغرف …
الاولى …الغرفه العاديه …الثانيه …VIP ….الثالثه …VVIP .
انا محتارة بعد اولد عند برافينا في ان ا م سي دبي والا عند ندى حمزة وهي تولد في ان ا م سي بعد. ارجوكم لاتبخلون بالتجارب
خواتي اللي تراجع في ان ام سي بذكركم بشغله مهمه.
انه في العياده دكتورتين تتشابه أساميهم بالضبط وحده شاطره والثانيه ماتودي وأول مره كنت سايره عن برافينا من الزحمه عندها ولازم مواعيد استهبلوا عليي وغافلوني على الدكتورة بابيتا
ويوم خبرتهم قالوا انه اتلخبط عليهم الاسم عقب قالوا لي زحمه عندها ولازم موعد
عقب سألت وأتأكد انهم دكتورتين تشابه في الأسامي بس إختلاف بالخبره واتأكدوا قبل من الدكتورة
*****************************
أنا في بجري ربيت في NMC في القصيص وخذت غرفة في اي بي الحمدلله غرفة عودة وزينة وعندهم بعض في في اي بي والغرفة وااااايد عودة…..
فهالحمل بعد اراجع عند دكتورة برافينا زينة وشاطرة بعد الحمدلله مرتاحة وياها.
*
سرت ان ام اسي اسال عن الاسعار والدكاتره وقالت لي الفلبينيه الطبيعي 7000 والقيصري 13 الف وبصراحه ارتحت للمستشفى بشكل عام بس انااراجع عند دكتوره نهله اللي تولد في بلهول الدكتوره نهله تولد في بلهول الطبيعي ب10 والقيصريه ب18 .
*
أنا رحت مستشفى ان أم سي وقالوا الولاده الطبيعيه 7000 وألقيصري أظن تبدأ من 13 ألف وشفت الغرف عندهم الغرفه العاديه تشمل مع 7 آلاف فيه شبريتين واحد حق الأم والثاني حق المرافق والغرفه لابس بها وألفي أي بي الليله ع 2500 درهم وغرفة حلوه ومرتبه ونظيفه وفي بعد ألفي في أي بي تشبه ألفي أي بي بس أكبر وارتب والليله على 3500 .
____
الحكومي
إقتباس:
الرسالة الأصلية كتبت بواسطة fatita6
بنات شو رايكم في مستشفى القاسمي بالشارجه
انا ربيت بالقاسمي 22/1/2017
ولدتني الدكتوره ( شهوب ) عراقيه + الدكتوره ( غزاله ) باكستانيه.
بس تعااامل ( بعض ) النيرسات ماعيبني ،،~
الرسالة الأصلية كتبت بواسطة ونة العود
حد جرب الولاده فالقاسمي ؟؟
عكثر اللي اسمعه عنهم بس يمدحونه فالولاده واهتمامهم بالام والبيبي وايد ..
دخيلكم اللي مجربه الولاده فيه تخبرني لاني فالسابع ولين الحين مافتحت ملف كل حد يشور علي بمكان
حرمة اخويه و خالتي ولدن فالقاسمي ،، بصراحه ما عليهم غبار
كل حد يمدح ولادتهم .. النيرسات يصبرن علييج مب على طوول يلله عمليه .. و حنونات ما يصرخن علييج
بس انا سمعت انه اذا وقت ولادتج كان في زحمه عندهم .. عادي يولدونج ماادري وين انا سمعت انه في ممرات قسم الولاده … يعني مش في غرفة الولاده
وحده من اهل ريلي ولدوها فالممر لنه واايد زحمه عندهم
الخاص
أسعار مستشفى الزهراء حتى الساعة الاخيرة 31/12/2017م
هي كالتالي:
( بدون علاج خلال فترة الحمل )
– ليلة: بين 6500 درهم إلى 7000 درهم
– ليلتين: من 9000 إلى 10.000 درهم
– 3 ليالي: 12.000 درهم ( مع العلاج والمتابعة أثناء فترة الحمل )
– ليلة: 9000 درهم
– ليلتين: 10.800 درهم
– 3 ليالي: 12.000 درهم
هذا للولادة الطبيعية
أما السعر للعملية القيصريه فهو:
– ( 4 ليالي ) والسعر يتراوح بين 18.000 و 20.000 درهم
– للمرافق: 150 درهم لكل ليلة ..
******************************
إقتباس:
الرسالة الأصلية كتبت بواسطة ام الحلوين2
بنات من فضلكم هل مستشفى الزهراء من ضمن المستشفيات إلي تتعامل مع الضمان الصحي ثقه
لا، للأسف
إقتباس:
الرسالة الأصلية كتبت بواسطة كيوت ومن
والي عندها بطاقه تامين تتدفع للغرف ولا غير شامل.
يعتمد على نوع البطاقة اللي عندج..
هن كلهن ضمان : ( ثقه )
بس في نصهن مكتوب عليهن public AD يعني بس في ابوظبي ..
وللأسف ما تنفع في الإمارات الثانيه.
وشي بطاقات غير ..
كاتبين فيهن كل شي ..
( بتحصلين هالسطر مكتوب في البطاقة تحت على اليمين )
مكتوب ..
يشمل: العيادات، والغرف الخاصة و ……. و ………. الخ …
^
^
^
انتي تقصدين تأمين من الدوام !
يعني شرات اللي في اتصالات و ….. و ……..؟!
هيه هذي تمشي ..
وتشمل الغرف ..
إقتباس:
الرسالة الأصلية كتبت بواسطة Moon!
ممكن معلوماتكم حول…………..!!!
مستشفى الزهراء الشارجه..
افضل دكتوره؟؟ تقريبا كل الدكاتره فنانات وشاطرات (انا اخترت د0 اميره ) وايد ارتحت لها وتصبر عليج وخياطتها ممتازه
الاسعاااار؟؟ ما ادري ريلي نسى بس على ما اعتقد ب 13 الف ( الولاده الطبيعيه )
الغرفه؟؟ الغرف العاديه شويه صغيره بس عادي انا اهم شي عندي النظافه والتعامل والخدمه وانصح كل حامل اتسير هالمستشفى لان وايد اوكي والحين انا حامل وبربي بعد عندهم باذن الله
انا ربيت فالزهرا قيصرية، وكلفتنيه العملية والغرفة في اي بي لمدة اربعة ايام تقريبا 28000 درهم، سوولي خصم 4000 بدون ما اقولهم، اهتمامهم كان وااايد ممتاز فيني وفالبيبي…
إقتباس:
الرسالة الأصلية كتبت بواسطة باربي الإمارات
السلام عليكم…انا قررت افتح ملفي فالزهراء ان شاءالله..انا بدش الخامس وابغي بس ولادة وغرفة عندهم بدون مراجعة يصير؟ وحدة من اهلي مدحوا اميرة المصرية و2 بعد وافكر احجز عندها فياريت اللي مجرب لايبخلوا والله يسهل على الجميع ويرزق المحرومات يارب
أنا ولدت عند أميرة ما شاء الله عليها ممتازة وتراعي الحرمة اللي بتربي وايدها خفيفة وهي صبورة الحمد لله الله يسر لي دكتورة شاطرة فاحجزي عندها وانت مطمئنة والله يسرلك
**********************************
انا في حملي الاول ربيت في مستشفى الزهراء عند دكتوره اميره
ما شاء الله عليها فنانه وطيوبه وتعاملها وايد حلو وخياطتها وايد نظيفه وحتى في المواعيد اذا كان عندج استفسار اتجاوب عليه بالتفصيل بس اذا كل شي طبيعي تخلصج بسرعه لان وايد زحمه عندها.
تعامل الممرضات زين والغرف نظيفه والاسعار تلقونها في موقعهم
*********************************
السلام عليكم
الحمدلله انا ربيت في الزهرا عند الدكتوره تفيسه ووايد حنونه وصبوره
وماشا الله معاملة الممرضات روعه.
وكلفني تقريبا ۷وشوي هذي عاده سنة 2009
******************************
انا بصراحه ربيت ابولدى الاول فزليخه بس معاملتهم مب شئ ولا يهتمون؟والثانى بالزهرا بصراحه يهتمون فيج وبالياهل .
*******************************
مستشفى زليخة فالشارجة الطبيعي 3000 و القيصري 8000 بس طبعا بيكون في زيادة حوالي 2017 لأنه الغرف صغيرة فعشان تاخذين ال deluxe or vip لازم تدفعين زيادة
وانا بربي هناك عند دكتورة اسمها بيتي شاطرة ماشاءالله .
تعرفون شي عن المستشفى الملكي فالشارجه
انا سألت كم وحدة من اهلنا مربين قبل شهرين تقريبا في الملكي ومدحولي اياه
وانا الحين بديت مراجعاتي عندهم
*******************************
الصراحة المستشفى الملكي اللي الشارجة يقولون وايد اوكي ربيعتي ربت هناك وبنت عمتي ويقولون وايد زين
انا بقولج اللي سمعته عن المستشفى الملكي.
بصراحة كل حد ما مدحلي وقالولي ان الزهراء احسن بوايد..
مستشفيات عجمان
انا ربيت في جي ام سي بس ما ارتحت فيه للامانة هم كويسين بس ما ارتحت للمكان
اسعارهم 2500 مع غرفة خاصة لمده يوم ( ولاده طبيعية )
الرسالة الأصلية كتبت بواسطة حبي w
بنات شو اسعار مستشفى جي ام سي عيمان حاليااااااااااا؟
حد يرد علي بللللللللليز لان ما بقى ع ولادتي الا شهرين… وابا ارتب اموري….
يوم الخميس اللي طاف اتصلت على المستشفى وسألتهم قالولي ان الولاده الطبيعية 3000 والقيصرية 7000*******************************
انا ربيت مرتين فالكورنيش بس الحين ابدا ما يمدحونه واايد قضايا ومشاكل بسبب الاداره اليديده..
هالمره انا ناويه اربي فالنور اليديد..ومن اول حملي اراجع عندهم..ومن اسبوع خذت موعد عشان اشوف غرف الفي اي بي والرويال عندهم على انهم ما فتحوهن رسمي بس فيه شيخات ربن وخذن الرويال..وسرنا انا وريلي وشفنا الفي اي بي بس انصدمت انه وايد صغير واحنا ماشالله هلنا وااايد وهو عباره عن غرفتين صغار..وعقب سرنا شفنا الرويال وايد عود كأنج في شقه بس ماكان مرتب لان كانت وحده من الشيخات توها طالعه وكانو يشلون اثاثها لانها شلت اثاث المستشفى…
والجناح الملكي عباره عن:
*غرفة المربي:ارضيه خشب وكبيره مع طقم كراسي وفيها باب يوديج على غرفه ثانيه الي هيه غرفة النيرس والدكتوره والنيرس اتكون مسؤله عن البيبي من تدخلين المستشفى لين ما تطلعين..
*غرفة المرافق: فيها سراير او انتي تطلبين شو اتحطين فيها وكم سرير تبين..
*مطبخ صغير
*مجلس حريم: ارضيه خشب وكبير وايد حلو..
*مجلس رجال: حجم عادي
*مجلس ثالث: كيفج اتسوين فيه الي تبينه مثلا غرفه طعام والا بوفيه والا اي شي..
والمميز في هذا كله لج بوابه خاصه ولفت او اصانصير وباركينج كامل عند المستشفى مكتوب عليه مواقف الجناح الملكي..
ريلي اتخبل عالجناح الملكي وحجز بس انا اشوفه واااايد كبير وهو يقولي ماشي حل ثاني..
الصدمه الي مبالغ فيه الاسعار:
سعر الفي اي بي = 5800 درهم..والضمان ما يغطي الا 1500 سعر الغرفه العاديه..
سعر الرويال = 18 الف و 500 بعد لووول…وبعد الضمان ما يغطي الا 1500 وهم يسوون خصم 10 او 15 بالمئة .